Classe Verte (02.06. - 07.06.2024)
An der Woch vum 02.06.2024 bis de 07.06.2024 ass den MLG mat 67 Septièmes-Schüler:innen op Les Orres an d’franséisch Alpen an d'Classe Verte gefuer.
No enger roueger Urees mat méi a manner midde Schüler a Proffen hu mir eist Zil, den « UCPA Les Orres » erreecht.
No engem éischten Owend, dee mir genotzt hunn, fir eis emol gemittlech anzequartéieren a verschidde Schüler fir d'éischte Kéier e Bett opgezunn hunn, si mir Méindes an eis Aktivitéite gestart. Um Programm stoungen Rafting op der Durance a Kayak, Canoe an Airboat fueren um "plan d'eau", souwéi eng Waasserolympiad mat enger sëlleger Unzuel un ënnerschiddlechen Disziplinnen an deenen eis Schüler sech matenee moosse konnten. No enger kuerzer Agewinnungszäit un dat kaalt Biergwaasser waren eis Schüler mat Spaass a Freed dobäi. Dëst war natierlech och bedéngt duerch dat gutt Wierder, vun dem mir déi ganz Woch profitéiere konnten.
Ma net nëmmen déi sportlëch Eaux-vives-Aktivitéite konnten eis Schüler begeeschteren. Och déi impressionant Natur, de Ravitaillement, esou wéi déi ënnerschiddlech Owesaktivitéite wéi e Wëssensquiz, e Museksquiz an verschidden « jeux défis » mat oofschléissender « Boum » waren e vollen Erfolleg.
Ënnert dem Stréch bleift festzehalen, datt mir als Equipe eng flott Woch verbruecht hunn, an datt d'Kanner sech net nëmme sportlech ausliewe konnten, mä och eng Rei sozial Kompetenze wéi Mateneen an fir Jiddfereen, Respekt, Frëndlechkeet a Kommunikatioun, och emol ouni Handy, stäerke konnten.
